БАСПАСӨЗ ХАБАРЛАМАСЫ

2026 жылғы 5 шілде                                                                Павлодар қ.

Ұлттық домбыра күніне арналған мерекелік концерт

Құрметті павлодарлықтар және қала қонақтары!

Иса Байзақов атындағы Павлодар облыстық филармониясы Қазақстанның ең бірегей әрі рухани мәні зор мерекелерінің бірі – Ұлттық домбыра күнін бірге атап өтуге шақырады!

Күні: 2026 жылғы 5 шілде

Өтетін орны: ERTIS PROMENADE

Басталуы: 19:00

Ертістің көркем жағалауында Ұлы даланың басты музыкалық символы – домбыраға арналған жарқын мерекелік бағдарлама өтеді. Бұл ғажайып аспап ғасырлар бойы ұлттық мәдениеттің ажырамас бөлігі ғана емес, қазақ халқының тарихын, жады мен даналығын, рухани құндылықтарын сақтап келе жатқан тірі шежіре болып келеді.

Қазақстанда 2018 жылы бекітілген Ұлттық домбыра күні халқымыздың бай музыкалық мұрасына ұқыпты қараудың, дәстүрлі өнерді жас ұрпақ арасында сақтап, кеңінен насихаттаудың символына айналды. Бүгінде қазақ домбырасының сиқырлы үні әлемнің ең ірі сахналарын бағындырып, Қазақстаннан тыс жерлерде де ұлттық музыка жанкүйерлерінің миллиондаған тыңдарманын біріктіруде.

Домбыра өнері тарихында Павлодар өңірінің де орны ерекше. Бұл – әйгілі ақындар, әншілер мен күй орындаушыларының мекені, ұлы ақын әрі композитор Иса Байзақовтың туған жері. Оның есімімен Павлодар облыстық филармониясы аталады. Дәл осы өңірде халықтық музыкалық өнердің ең үздік дәстүрлері ұқыптылықпен сақталып, одан әрі дамып келеді. Сондай-ақ ұлттық музыкалық мұраны дамытуға өлшеусіз үлес қосқан көрнекті шеберлердің есімдері де біздің өңірде ерекше құрметпен аталады. Солардың бірі – домбыраны және басқа да ұлттық аспаптарды оркестрлік орындауға бейімдеп, жаңғыртқан әйгілі домбыра жасаушы Қамар Қасымов.

Мерекелік кешті Қазақстан Республикасы мәдениетінің үздігі Айгүл Дайырбаеваның жетекшілігіндегі атақты «Нұр» би ансамблі «Домбыраға арнау» хореографиялық композициясымен ашады. Бұл қойылым қазақ халқының қасиетті аспабына арналған жарқын тағзым болмақ.

Бағдарламаның негізгі оқиғаларының бірі – композитор Мұрат Құсайыновтың «Пір Дастан» атты көлемді шығармасының белгілі дирижер әрі композитор Айткали Жайымовтың оркестрлік өңдеуіндегі орындалуы болмақ. Одан әрі домбырашы әрі композитор Әділет Сейітовтің туған өлке мен айбынды Ертіске деген шынайы сүйіспеншілікке толы «Ертіс вальсі» авторлық күйі ұсынылады.

Мерекенің ерекше атмосферасын қазақ музыкалық мәдениетінің классиктері туындылары қалыптастырады. Рүстембек Омаров атындағы қазақ халық аспаптары оркестрінің орындауында, Қазақстанның еңбек сіңірген қайраткері, дирижер Талғат Каримовтың жетекшілігімен, Ахмет Жұбановтың әйгілі «Тәжік биі», Дина Нұрпейісованың «Науаи» шығармалары, сондай-ақ Бақытжан Дүйсенғазиевтің «Дауылпаз жырау» және «Ақберен» атты жарқын оркестрлік композициялары шырқалады. Оркестр қазақтың тұңғыш кәсіби домбырашысы, біздің көрнекті жерлесіміз Рүстембек Омаровтың есімімен аталады.

Вокал өнерін сүйетін көрермендерді танымал халықтық және авторлық шығармалар қуантады. Жанболат Байсолтанның орындауында Біржан салдың әйгілі «Он саусақ» әні, ал Гүлназ Қыздарбекованың орындауында бірнеше буынның сүйікті әніне айналған Манарбек Ержановтың «Сайра, бұлбұл» туындысы және Ғарифолла Құрманғалиевтің патриоттық «Сәлем саған, Қазақстан!» әні орындалады.

Көрермендер үшін нағыз музыкалық сый ретінде филармония солисі Әлижан Қазбековтің «Тақиялы періште» аңызға айналған кинофильміндегі әйгілі «Алматы туралы әнді» орындауы ұсынылады, ал Алмас Мұқатайдың орындауындағы Ж. Омаровтың «Өзіңді аңсап» атты сырлы композициясы тыңдарманға ерекше жылылық сыйлайды.

Кештің шарықтау шегі – филармония солисі Мәди Түлевтің орындауындағы Құрманғазының әйгілі «Адай» күйі болмақ. Бұл шығарма қазақтың аспаптық өнерінің ең ұлы жауһарларының бірі, еркіндік пен рух күшінің, ұлттық болмыстың символы ретінде әділ танылған.

Бағдарламада көрнекті композитор Нұрғиса Тілендиевтің шығармалары да ерекше орын алады. Оның әйгілі «Алатау» және «Саржайлау» әндері Мадияр Бахтияров пен Қазақстан мәдениетінің үздігі Нұржан Сарқамбаевтың орындауында мерекелік кештің шынайы сәніне айналмақ.

Барша павлодарлықтар мен қала қонақтарын осы жазғы кешті бірге өткізіп, домбыраның сиқырлы үніне, керемет музыкаға, жарқын хореографиялық қойылымдарға бөленіп, халқымыздың баға жетпес рухани мұрасына тағы бір мәрте жақындасуға шақырамыз.

5 шілдеде ERTIS PROMENADE алаңында кездесіп, Ұлттық домбыра күнін бірге атап өтіп, Ұлы даланың жүрек соғысын бірге сезінейік!

Иса Байзақов атындағы Павлодар облыстық филармониясы