«Нұр» Астанада өтетін Экосаммитте өнер көрсетеді

Павлодар облысының ең ірі кәсіби хореографиялық ұжымы Орталық Азия мемлекеттері басшыларының қатысуымен Астанада өтетін экологиялық саммитке шақырту алды. «Нұр» би ансамблі түрлі елдерден келген 1,5 мыңнан астам делегат алдында өнер көрсетеді. Бұл туралы артистер Иса атындағы филармонияның 85 жылдығы мен Халықаралық би күніне арналған концертте мәлімдеді.

Экологиялық саммит 2026 жылғы 22-24 сәуір аралығында Қазақстан астанасында өтеді. Негізгі тақырыптар қатарында Каспий және Арал бассейндерінің су ресурстарын қорғау, «жасыл» қаржыландыруды дамыту, экологияда цифрлық технологияларды қолдану, азық-түлік қауіпсіздігі, ауа сапасы және өзге де өзекті мәселелер бар. Саммит қорытындысы бойынша өңір елдері басшыларының Бірлескен декларациясы қабылданып, БҰҰ-ның 2026-2030 жылдарға арналған Өңірлік іс-қимыл бағдарламасы бекітіледі деп күтілуде.

«Туған сахнамыздағы үлкен мерекелік концерт – Халықаралық би күніне орай көрермендерімізге арналған дәстүрлі көктемгі сыйымыз. Биыл филармонияның мерейтойы да қатар келіп отыр. Осы концерттен кейін бірден Астанаға жол тартамыз. Бізге халықаралық экологиялық саммит алаңында өнер көрсету мәртебесі бұйырды. Бұл үлкен жауапкершілік», - деді ұжымның көркемдік жетекшісі, Қазақстанның мәдениет саласының үздігі Айгүл Даирбаева.

Мерекелік кеште артистер қазақ биінің байлығы мен көпқырлылығын паш етті.

«Қазақ биі – ерекше философия. Әрбір қимылдың өз мәні бар: бірінде ою-өрнек, бірінде символика. Мысалы, аққу мен қаратөрғай бейнесі мінезі, болмысы, пластикасы мүлде бөлек. Қуаныш, бақыт, еркіндік немесе керісінше күрес, сынақ, алаңдаушылық – бәрі нақты, артық қимыл жоқ. Әйелдер биінде нәзіктік пен ішкі әлемнің байлығын жеткізу маңызды. Ерлер биінде батылдық, ептілік, ерлік айқын көрінеді. Біз халықтық дәстүрлерді, кәсіби қазақ хореографиясының негізін қалаушылардың қойылымдары мен қимылдарын зерттей отырып, ұлттық бидің сұлулығы мен даналығын насихаттауға тырысамыз», - дейді Айгүл Рамазановна.

Кештің арнайы қонағы – «Гүлдер» мемлекеттік хореографиялық ансамблінің жетекші артисі Аққанат Смағұлова болды. Ол – жерлесіміз, төрт жасынан бастап би өнерімен айналысып келеді.

«Нұр» - Павлодардың мәдени бренді ғана емес, оны еліміздің бүкіл хореографиялық қауымдастығы жақсы таниды және құрметтейді. Бұл жоғары кәсіби, Қазақстандағы үздік ұжымдардың бірі. Олармен бір сахнада өнер көрсету мен үшін үлкен қуаныш. Әріптестерімнің арқасында Павлодарға қайта келудің сәті түсті. Өкінішке қарай, гастрольдік кестенің тығыздығына байланысты туған қалаға жиі келе алмаймын. Филармония да, «Нұр» ансамблі де өнер адамдарының арасында үлкен беделге ие. Себебі бұл нағыз сахна шеберлерінен құралған салмақты ұжым. Павлодар артистерінің репертуарын, жаңа ізденістерін барлығы жіті қадағалап отырады. Филармонияны мерейтойымен құттықтаймын. Туған жердің перзенті ретінде Павлодардағы мәдениет пен өнердің жоғары деңгейде дамып жатқанына қуаныштымын», - деді Аққанат.

Көрермендер әр нөмірді ерекше ықыласпен қабылдады. Бұл кеште артистерді қолдауға олардың туған-туыстары мен жақындары келді.

«Қанша айтса да, толқу әрдайым болады. Мені ең жақын жандарым жұбайым Наталья мен кішкентай қызымыз қолдайды. Аннаға бір жас үш ай ғана болса да, бәрін түсінеді. 18 биді орындау оңай емес, бірақ біз жақсы дайындалдық, бәрі сәтті өтті. Әсіресе халықтық қазақ биі – өте күрделі бағыт, себебі оның қатаң канондары бар. Оларды кезінде Шара Жиенқұлова, Дәурен Әбіров сынды корифейлер қалыптастырған. «Қазақ өрнектері», «Шашу», біздің «Балбырауын» - мұра би, барлық қимылдар нақты жүйемен орындалады. Қазіргі билерде еркіндік көбірек, ал дәстүрлі қазақ биінде өзіндік тыйымдар бар. Оның сұлулығы да осында, біз соны мақтан тұтамыз», - деп аттап етті Филипп.

Мерекелік бағдарламада сондай-ақ Құрманғазы атындағы консерватория түлегі Мәди Төлеуов жетекшілік ететін «RUH» этно-фольклорлық тобының музыканттары және талантты скрипкашы, театр режиссёры Мәлике Қатай өнер көрсетті.

Иса Байзақов атындағы Павлодар облыстық филармониясы